दुप्चेश्वरमा एकैदिन सांढे दुई लाख भेटि
बिदुर-देवताहरुको पनि देवता भगवान शिवको प्रसिद्ध दुप्चेश्वर मन्दिरमा भक्तजनहरुको आगमन दैनिक रुपमा वढिरहेको छ । दुप्चेश्वरमा विशेष पुजा आराधना गर्ने भक्तजनहरु निकै वढिरहेका छन् । नुवाकोटको उत्तरी भेगमा रहेको प्रसिद्ध दुप्चेश्वर महादेवको मन्दिर रहेको धाममा शनिवार हजारौं भक्तजनहरुले पुजापाठ तथा दर्शन गरेका छन् । प्रसिद्ध दुप्चेश्वर हिन्दु तथा वौद्धमार्गीको सामूहिक तीर्थस्थलको रुपमा विकसित भइरहेको छ ।
दुप्चेश्वर धाममा पछिल्लो समय दैनिक हजारौं भक्तजनहरु पुग्नुले पनि यस विषयको पुष्टि गरेको छ । हजारौं भक्तजनहरुले एकैदिन लाखौं रुपैया भेटी चढाउंदै आएका छन् । उक्त स्थानमा पुग्न नुवाकोटको विदुरवाट यातायातमा डेढ घण्टा र काठमाडौवाट दुई घण्टामा पुग्न सकिन्छ । हिन्दु र वौद्ध धर्मावलम्वीहरुको आस्थाको केन्द्र ऐतिहासिक तथा धार्मिक महत्वको दुप्चेश्वर महादेव मन्दिरमा भक्तजनहरु आउने क्रममा वढोत्तरी भएसंगै भेटी सङ्कलन कार्य पनि वढिरहेको दुप्चेश्वर गापा अध्यक्ष शंकरवहादुर थापाको भनाई छ ।
दुप्चेश्वर धाममा छिमेकी मुलुक भारतवाटसमेत तीर्थालु आउने गरेका छन् । दुप्चेश्वरमा कार्तिकको चौथो शनिबार दुई लाख ४० हजार तीनसय १५ रुपैया भेटी संकलन भएको कोषका कोषाध्यक्ष राजकुमार श्रेष्ठले जानकारी दिए । उनका अनुसार संकलित भेटिमध्ये मन्दिरमा मध्यान्ह आरतीको एकलाख २३ हजार चारसय ३५ रुपैया र कयुआर कोडमार्फत १२ हजार ५सय ३० रुपैया भेटी संकलन भएको छ । दुप्चेश्वर धाममा भक्तजनले चढाएको भेटी प्रत्येक दिन बेलुकी ५ बजे सामूहिक रुपमा गणना गर्ने कार्य भइरहेको छ ।
कोषाध्यक्ष श्रेष्ठका अनुसार पछिल्लो तीन वर्षदेखि दुप्चेश्वर मन्दिरमा आउने भक्तजनको उपस्थिती वढिरहेको र उचित व्यवस्थापनका लागि कोष तथा दुप्चेश्वर गापा कार्यालय समुन्द्रटार क्रियाशील रहेको बताए । दुप्चेश्वर धाममा दर्शन गर्नका लागि आउने श्रद्धालु भक्तजनहरु मध्ये अपांगता भएका तथा ज्येष्ठ नागरिकहरूको लागि सहज र सुरक्षित रुपमा विशेष बैकल्पिक मार्गको व्यवस्था गरिएको छ । प्रसिद्ध दुप्चेश्वर धाममा आन्तरिक तथा वाह्य भक्तजनहरुकोसमेत आगमन भइरहेको छ । नेपाल, भारत, भुटान, वर्मालगायतका स्थानमा चर्चा कमाइसकेको दुप्चेश्वर मन्दिरमा दैनिक रुपमा हजारौं भक्तजनहरु आउने क्रमसमेत वढिरहेको स्थानीयवासी तथा पुजा आरती समितिका सदस्य रमेशप्रसाद आचार्यको भनाई छ ।
पशुपतिनाथको पर्यायको रुपमा रहेको दुप्चेश्वर मन्दिरमा जानका लागि यातायातको पहुंच र सहजतासंगै भक्तजनहरु आउने क्रमसमेत वढिरहेको पुजारी भगवानहरि धितालको भनाई छ । आकर्षक करेजुङ पहराको सितल र चिसो स्थानमा रहेको दुप्चेश्वरमा पुगेका सर्वसाधारणले गाइको दुध तथा पशुचौपायाको दाम्लो चढाउनेसमेत गर्दछन् । सो मन्दिरमा काठमाडौ तथा सदरमकुाम विदुरदेखि यातायातको सहजता रहेको छ । दुप्चेश्वर गाउँपालिका–६ रामती नजिकै करेजुङको ठुलो पहरामा रहेको प्रसिद्ध दुप्चेश्वर महादेव मन्दिरमा शनिवार मात्र एकैदिन पांचहजार भक्तजनले दुप्चेश्वरको दर्शन र पुजाआजा गरेका छन् ।
दुप्चेश्वर धाममा दर्शन गर्नेहरुको घुइचो अपरान्हसम्म नै लागेको थियो । दुप्चेश्वरमा साउन महिनापछि पहिलो पटक शनिवार भक्तजनहरुले चढाएको झण्डै सांढे दुई लाख रुपैया भेटि संकलन भएको हो । भक्तजनहरु वढेका कारण भेटी संकलन पनि वढेको दुप्चेश्वर क्षेत्र विकास कोषले जनाएको छ । यातायात र सुलभ वाटोको प्रभावकारिताका कारण नुवाकोटको प्रसिद्ध तीर्थस्थल दुप्चेश्वर मन्दिरमा यति धेरै भेटी रकम सङ्कलन भएको हो ।
प्रसिद्ध दुप्चेश्वर धाममा जान नुवाकोटको सदरमुकाम विदुर र काठमाडौवाट सिधै यातायातको साधन जाने गरेको छ भने सो मन्दिरमा हिन्दु तथा वौद्ध समुदायका सर्वसाधारण पुग्ने गरेका छन् । दुप्चेश्वरमा शनिवार मात्रै पांचहजार जनाले मन्दिर पुगेर पुजाआजा गरेका छन् । जसमध्ये ६० प्रतिशत महिला रहेका थिए । पांच घण्टासम्म मन्दिर दर्शन गर्नका लागि भक्तजनहरु लाइन लागेको थियो ।
दुप्चेश्वरमा आएकाहरुलाई पुजाआजा र महादेवको शिला दर्शनमा कुनै बाधा नहोस् भन्ने उद्देश्यले, नजिकैको भजन मण्डलीमा सम्पर्क गरी वैकल्पिक मार्ग प्रयोगको अनुमति तथा सहजीकरणकोे व्यवस्था गरिएको दुप्चेश्वर क्षेत्र विकास कोषले जनाएको थियो । उक्त व्यवस्थामार्फत सबै वर्ग र अवस्था भएका भक्तजनले दुप्चेश्वर महादेवको दर्शन गर्न सकुन् भन्ने उद्धेश्य रहेको कोषाध्यक्ष श्रेष्ठको भनाई छ ।
दुप्चेश्वर धाम जान सर्वसाधारणले गाडी रिजर्भ गर्नुका साथै निजी गाडी र मोटरसाइकलमासमेत पुग्ने गरेका छन् । हिन्दु र वौद्धमार्गीहरु दुप्चेश्वर धाम पुग्दै आएका छन् ।
कार्तिक महिनामा खेतिपातीको काम र चाडपर्व सकिएकाले पनि मन्दिरमा दर्शन गर्न आउने भक्तजनको संख्या वृद्धि भएको कोषले जनाएको छ । पछिल्लो समय काठमाडौसहित नुवाकोट, रसुवा, धादिङ, काभ्रे, चितवनसहित अन्य स्थानबाट सहज रुपमा सवारीसाधनमा मन्दिरसम्म नै जान पाईने भएकाले दर्शनार्थी बढिरहेका हुन् ।
दोस्रो पशुपतिनाथको पर्यायका रुपमा रहेको दुप्चेश्वरमा लिखु गाउँपालिका–६ छहरेस्थित सेई बोर्डिङ स्कुलले दुप्चेश्वर महादेव मन्दिर परिसरमा सरसफाइ अभियान गरेको छ । धार्मिक तथा सांस्कृतिक सम्पदाको संरक्षणमा विद्यार्थीहरूको सहभागिता बढाउने उद्देश्यले शनिवार भक्तजनहरु धेरै भएको दिन सरसफार्य कार्यक्रम सम्पन्न गरिएको सो स्कुलले जनाएको छ ।
सेई वोर्डिङ स्काउटमा आवद्ध कक्षा ७ देखि ९ सम्मका ४० जना विद्यार्थीहरूले लगातार ६ घण्टा मन्दिर परिसरमा फोहोर संकलन, सफाइ र भक्तजनहरूको लाइन व्यवस्थापनमा सहयोग गरेका हुन् । दुप्चेश्वरमा शनिबार मन्दिरमा भीड बढी हुने भएकाले अभियान गरिएको प्रिन्सिपल राजन खतिवडाले वताए ।
उनका अनुसार उक्त कार्यक्रमले विद्यार्थीमा संस्कृतिको पहिचान, सेवा भावना र सामाजिक जिम्मेवारीबोध विकास गर्न मद्दत गर्दछ । कार्यक्रममा शिक्षक तथा कर्मचारीहरू खटिएका थिए । दुप्चेश्वर मन्दिर परिसर सफा र व्यवस्थित गर्नका लागि सो विद्यालयले दुप्चेश्वर महादेव मन्दिर व्यवस्थापनलाई ४ वटा डस्टबिन र १० वटा कुचो हस्तान्तरण गरेको छ । विद्यालयले सामाजिक उत्तरदायित्व अनुरूप उक्त गतिविधि गरेकोे जनाएको छ ।
अन्य हेडलाइन
सर्वाधिक रुचाइएको
