सरकारले वार्ता टोली नबनाए आकस्मिक र कोभिडबाहेकका सेवा ठप्प पार्छौं : डा. कार्की
मकवानपुर । सत्याग्रही डा. गोविन्द केसीको कुरा सुनिदिन सरकारलाई पटक-पटक आग्रह गर्दा पनि वास्ता नगरिएको नेपाल चिकित्सक संघका अध्यक्ष डा. लोचन कार्की बताउँछन् ।
सत्याग्रह सुरु गरेको २४ दिन पुग्दा पनि डा. केसीका मागका विषयमा छलफल गर्न सरकारले एउटा वार्ता समिति बनाउनसमेत नसक्नु विडम्बना भएको उनी बताउँछन् । उनले सरकार डा. केसीका मागमा अझै संवेदनशील नबनेको आरोप पनि लगाए । डा. केसीको जीवन तलमाथि भए त्यसको जिम्मा पनि सरकारले लिनुपर्ने उनले बताए ।
उनले भने, “पटक-पटक सरकारलाई वार्ता समिति बनाइ डा. केसीसँग छलफल गर्न आग्रह गर्दा पनि नसुनेर बसिएको छ । डा. केसीको जीवन तलमाथि भए सरकारले ठूलो मूल्य चुकाउनुपर्छ ।” डा. केसीले आफ्नो स्वास्थ्यलाई ख्याल नगरी देश र जनताका लागि सत्याग्रह बसेको उनले बताए । एउटा प्रजातान्त्रिक मुलुकमा सत्याग्रहीले आफ्ना कुरा राख्न खोजेका छन् तर सरकारले सुनेको नसुने झैं गर्छ ।
सरकारलाई पटक-पटक ध्यानकर्षण गराउँदा पनि नसुनेपछि संघले आइतबार बेलुकाबाट ७२ घण्टे अल्टिमेटम दिएको थियो । त्यो बुधबार (आज) सकिँदै छ । डा. कार्कीका अनुसार अहिलेको कोरोना महामारीको समय भएकाले हामीले पटक-पटक सरकारलाई वार्ताका लागि अनुरोध गर्यौं तर सुनुवाइ भएन ।
आज बेलुकासम्म पनि सरकारले वार्ता समिति बनाएर छलफल नथाले देशैभरका अस्पतालका आकस्मिक र कोभिडबाहेकका सेवा ठप्प बनाउन बाध्य रहने पनि डा. कार्कीले चेतावनी दिए । उनले भने, ‘‘डा. केसी चिकित्सक संघको आजीवन सदस्य हुनुहुन्छ, हाम्रो घरका सदस्यको आँखैअगाडि ज्यान गएको टुलुटुलु हेरेर बस्न सक्दैनौं, जस्तोसुकै कदम चाल्न पनि बाध्य हुन्छौं ।”बाह्रखरी डटकमबाट
