बार्सिलोनाको जितमा मेस्सी र पिकेको गोल
मकवानपुर ।कप्तान लियोनल मेस्सी र जेरार्ड पिकेको गोलमा स्पेनिस क्लब बार्सिलोनाले च्याम्पियन्स लिग फुटबलअन्तर्गत समूह चरणको तेस्रो खेलमा जित निकालेको छ । बुधबार भएको खेलमा बार्सिलोनाले डायनामो क्युभलाई २-१ गोल अन्तरले हराएको हो ।
घरेलु मैदानमा भएको खेलमा बार्सिलोनालाई जित दिलाउन कप्तान लियोनल मेस्सी र जेरार्ड पिकेले एक-एक गोल गरे । उता डायनामोका लागि भिक्टोरले एक गोल फर्काए ।
खेलको पाँचौं मिनेटमा मेस्सीले गोल गर्दै बार्सिलोनालाई सुरुवाती अग्रता दिलाए । पहिलो हाफमा १-० गोलको अग्रता बनाएको बार्सिलोनाले दोस्रो हाफमा थप एक गोल गरेको थियो ।
बार्सिलोनाका लागि पिकेले खेलको ६५औँ मिनेटमा गोल गर्दै घरेलु टोलीको अग्रता दोब्बर पारे । ७५औँ मिनेटमा भिक्टोरले पाहुना टोली डायनामोका लागि एक गोल फर्काए ।
जितसँगै बार्सिलोनाले समूह ‘जी’ अन्तर्गत तीन खेलबाट ९ अंक जोडेको छ । बार्सिलोना तालिकाको शीर्ष स्थानमा छ । पराजित डायनामो एक अंकका साथ तालिकाको तेस्रो स्थानमा छ । बाह्रखरी डटकमबाट
