आयोजक एफसी मनहरीले जित्यो फुटबलको उपाधि
मकवानपुर । मकवानपुरको मनहरीमा सम्पन्न प्रथम स्वर्गीय गोकुल राउत स्मृति खुला नकआउट फुटबल प्रतियोगिताको उपाधि आयोजक टिम एफसी मनहरी युवा क्लवले जितेको छ ।
चुरियामाई युवा क्लव मनहरी ७ को आयोजनामा बुधबार (हिजो) सम्पन्न भएको प्रतियोगिताको फाइनल खेलमा एफसी सिमरा युनाइटेडलाई ३–० गोल अन्तरले हराउँदै उपाधिमाथि कब्जा गरेको हो ।
क्षेत्रीय रंगशाला रमौलीमा भएको प्रतियोगिताको बिजयी टिमले नगद ५० हजार र उपबिजेताले नगद २५ हजार र ट्रफी प्राप्त गरेको छ ।
मंसिर १५ गतेदेखि सुरु भएको प्रतियोगितामा १६ वटा टिमको सहभागिता रहेको थियो । क्लवका अध्यक्ष श्रीकृष्ण राउतको अध्यक्षतामा भएको कार्यक्रममा नेपाली कांग्रेस बागमती प्रदेश संसदीय दलका नेता एवम् मकवानपुर सभापति इन्द्रबहादुर बानियाँको प्रमुख आतिथ्यता थियो । कार्यक्रममा बानियाँले आयोजकलाई नगद १५ हजार हस्तान्तरण गरे ।
प्रतियोगिता समापन कार्यक्रममा नेपाली कांग्रेस मकवानपुरका सल्लाहकार भरत पराजुली, मनहरी गाउँपालिका अध्यक्ष एकराज उप्रेती, वडा नम्बर ७ का वडाअध्यक्ष ठाकुरराम तितुङ, कांग्रेस महासमिति सदस्य रञ्जन कालाखेती, कांग्रेस मकवानपुरका जिल्ला सदस्य नवराज उप्रेती, मनहरी उपभोक्ता समिति सदस्य पदमबहादुर तितुङ, इन्द्रबहादुर राउत, बिरू लामा, प्रकाश वर्तौलालगायतले मन्तव्य व्यक्त गरेका थिए ।
