हेटौंडा ९ मा टोलस्तरिय एट ए साइड फुटबलको तयारी
मकवानपुर । मकवानपुरको हेटौंडा उपमहानगरपालिका वडा नम्बर ९ मा तेश्रो टोल विकास संस्थास्तरीय एट ए साइड फुटबल प्रतियोगिताको तयारी गरिएको छ ।
यही माघ ६ गतेदेखि १३ गतेसम्म सञ्चालन हुने प्रतियोगिता नक आउटका आधारमा खेलाइने आयोजक मकवानपुर बेरोजगार युवा संगठनले जनाएको छ ।
हेटौंडा उपमहानगरपालिका वडा नम्बर ९ को आर्थिक सहयोगमा प्रतियोगिता आयोजना गर्न लागिएको आयोजक मकवानपुर बेरोजगार युवा संगठनका कार्यसमिति सदस्य एवं प्रतियोगिताको प्रचारप्रसार उपसमिति संयोजक आसिस खतिवडाले जानकारी दिए ।
वडा भित्रका १७ वटा टोल विकास संस्थाको १८ वटा टिमको सहभागिता रहेको प्रतियोगिताको उद्घाटन खेल साविक विजेता कुस्माण्ड टोल विकास संस्था र प्रगति टोल विकास संस्था बिच माघ ६ गते १२ बजेबाट हुनेछ ।
आयोजककका अनुसार प्रतियोगिताको विजेताले नगद तीस हजार, शिल्ड मेडल र प्रमाणपत्र तथा उप विजेताले नगद १५ हजार शिल्ड मेडल तथा प्रमाणपत्र प्राप्त गर्नुका साथै विधागत रुपमा उत्कृष्ट हुने खेलाडीलाई पुरस्कृत गरिनेछ ।
प्रतियोगिताको सम्पूर्ण खेल हेटौंडा औद्योगिक क्षेत्रको खेल मैदान मा खेलाइनेछ भने प्रतियोगिताको फाइनल खेल माघको १३ गते हुनेछ ।
