ट्याङ्करले ठक्कर दिँदा हिडीरहेका भुजेल गम्भीर घाइते
मकवानपुर । मकवानपुरको हेटौंडा उपमहानगरपालिका वडा नम्बर १९, नेवारपानीस्थित सडकमा भारतीय ग्याँस ट्याङ्करको ठक्करबाट एक जना पैदलयात्री गम्भीर घाइते भएका छन् ।
आज (बुधबार) दिउशो मनहरीबाट हेटौंडातर्फ आउँदै गरेको एनएल ०१ एल २४२० नम्बरको भारतीय ट्याङ्करले दिएको ठक्करबाट स्थानीय ५४ बर्षीय धीरबहादुर भुजेल गम्भीर घाइते भएका हुन् ।
जिल्ला प्रहरी कार्यालय मकवानपुरका अनुसार पूर्व पश्चिम राजमार्ग अन्तर्गत नेवारपानी सडक खण्डमा बाटो काट्ने क्रममा ट्याङ्करले भुजेललाई ठक्कर दिएको हो । गम्भीर घाइते भएका भुजेलको अहिले हेटौंडा ११ मा रहेको चुरेहिल अस्पतालमा उपचार भइरहेको प्रहरीले जनाएको छ । मकवानपुर प्रहरीका अनुसार ठक्कर दिने ट्याङ्कर र चालक नियन्त्रणमा छन् ।
