जसपासँग छलफलअघि कांग्रेसले बोलायो पदाधिकारी बैठक
मकवानपुर । प्रमुख प्रतिपक्षी दल नेपाली कांग्रेसले जनता समाजवादी पार्टी जसपा नेताहरुसँग छलफल गर्नुअघि पदाधिकारी बैठक बोलाएको छ।
शुक्रबार अपरान्ह ४ बजे जसपा नेताहरुसँगको भेटअघि ३ बजे सभापति शेरबहादुर देउवा निवास बुढानिलकण्डमा कांग्रेस पदाधिकारी बैठक बोलाइएको एक नेताले जानकारी दिए।
‘४ बजे जसपासँग छलफल हुने कार्यक्रम तय भएको छ, त्यसअघि सभापतिज्यूले पदाधिकारी बैठक बोलाउनु भएको छ’, ती नेताले नेपालखबरसँग भने।
उनले पदाधिकारी बैठकमा समसामयिक राजनीतिक विषय र नयाँ सत्ता समीकरणमा कसरी अगाडि बढ्ने भन्ने विषयमा छलफल हुने बताए।
जसपाले बिहीबार नयाँ सत्ता समीकरणका लागि एमाले, कांग्रेस र माओवादी तीनै प्रमुख दलहरुसँग शीर्ष नेताहरुले छलफल गर्ने निर्णय गरेको थियो। बिहीबार नै जसपाले प्रधानमन्त्रीसहित एमाले नेताहरुसँग छलफल गरेको थियो।नेपालखबर डटकमबाट
