कोरोनाविरुद्ध खोप लगाइदिए बापत घुस लिने दुई स्वास्थ्यकर्मी पक्राउ
काठमाडौं । कोरोना खोप लगाइदिए बापत घुस लिएको आरोपमा दुई जना स्वास्थ्यकर्मी पक्राउ परेका छन् ।
पक्राउ पर्नेहरमा महोत्तरी स्वास्थ्य चौकीमा हेल्थ असिस्टेन्ट पदमा कार्यरत अजय कुमार साह र कृष्णा कुमार यादव रहेका छन्।
साहले सेवाग्राहीसँग २० हजार रुपैयाँ घुस लिएर कोरोना खोप लगाइदिएको उजुरी अख्तियार दुरूपयोग अनुसन्धान आयोगमा परेको थियो ।
साहको निर्देशनमा यादवले कोभिड–१९ विरूद्धको खोप लगाई दिई सेवाग्राहीबाट २० हजार रुपैयाँ लिएका थिए । घुस लिइसकेको अवस्थामा उनीहरूलाई जनकपुर उपमहानगरपालिका–७ नयाँ बसपार्क, धनुषाबाट पक्राउ गरिएको अख्तियारले जनाएको छ ।
उक्त रकमसहित नियन्त्रणमा लिई थप अनुसन्धान भइरहेको अख्तियारले जनाएको छ।
