नामटारमा बुधबारदेखि फुटबल प्रतियोगिता हुने
मकवानपुर । मकवानपुरको कैलाश गाउँपालिका वडा नम्बर ९ नामटारमा बुधबारदेखि दोस्रो संस्करणको अध्यक्ष कप फुटबल प्रतियोगिता हुने भएको छ । बुधबारबाट सुरु हुने ९ ए साइड प्रतियोगिताको बुधबार कैलाश पालिकाका अध्यक्ष लोक बहादुर मोक्तानले उद्घाटन गर्नेछन् ।
आयोजकका अनुसार प्रतियोगिताको उद्घाटन खेलमा वडा नम्बर ४ र साविक विजेता वडा नम्बर १० भिड्ने छन् । विजयी टिमले बिहिबार वडा नम्बर १ सँग प्रतिस्पर्धा गर्नेछ । प्रतियोगिता अन्तर्गत बुधबार नै साविक विजेता वडा नम्बर ५ र वडा नम्बर ९ बीच प्रतिस्पर्धा हुनेछ । यस खेलको विजयी टिमले बिहिबार वडा नम्बर ८ सँग प्रतिस्पर्धा गर्नेछ । यस्तै बिहिबारको खेलमा वडा नम्बर २ र ३ तथा ६ र ७ नम्बर वडाबीच प्रतिस्पर्धा हुनेछ ।
नकआउट चरणमा हुने प्रतियोगिताको फाइनल खेलमा शनिबार हुनेछ । प्रतियोगिताको विजेता टिमले ७५ हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् । त्यस्तै उपविजेता टिमले ५० हजार रुपैयाँ प्राप्त गर्नेछन् । यस्तै सेमिफाइनलमा पराजित हुने दुई टिमलाई १०–१० हजार रुपैयाँ प्रदान गरिने आयोजकले जनाएको छ ।
