कैलाश गाउँपालिका अध्यक्ष कप फुटलब प्रतियोगितामा वडा नम्बर १० विजयी
मकवानपुर । मकवानपुरको कैलाश गाउँपालिकामा जारी दोस्रो संस्करणको अध्यक्ष कप फुटबल प्रतियोगिताको उद्घाटन खेलमा वडा नम्बर १० ले विजयी सुरुवात गरेको छ । कैलाश–९ स्थित नामटारमा सुरु भएको प्रतियोगिताको उद्घाटन खेलमा बुधबार वडा नम्बर ४ लाई ३–० गोलको फराकिलो अन्तरले पराजित गर्दै वडा नम्बर १० विजयी भएको हो ।
प्रतियोगितामा बुद्ध थिङ र सागर बलले एक–एक गोल गरे भने एक गोल आत्मघाती उपहार पाएको हो । वडा नम्बर १० प्रतियोगिताको साविक विजेता समेत हो । यस्तै बुधबारको दोस्रो खेलमा वडा नम्बर ५ र ९ बीच पहिलो हाफ खेलेर रोकिएको छ । बाँकी समयको खेल बिहिवार बिहान हुने रेफ्री सन्तोष राईले बताए ।
विजयी टिमले बिहिबार वडा नम्बर ८ सँग प्रतिस्पर्धा गर्नेछ । यस्तै बिहिबार वडा नम्बर २ र ३, वडा नम्वर ६ र ७ नम्बर बीच प्रतिस्पर्धा हुनेछ । कैलाश खेलकुद विकास समितिका संयोजक मोहन वाईबाको सभाध्यक्षतामा भएको प्रतियोगिता उद्घाटन कार्यक्रममा प्रतियोगिताको गाउँपालिकाका अध्यक्ष लोक बहादुर मोक्तानले उद्घाटन गरेका थिए । कार्यक्रममा गाउँपालिकाका उपाध्यक्ष बाल कुमार मल्ल, प्रमुख प्रशासकीय अधिकृत विनोद रोक्का र वडाध्यक्षहरुको उपस्थिति रहेको थियो ।
