पदमपोखरीमा ४० जना कृषकलाई कृषि सामग्री वितरण
मकवानपुर । मकवानपुरको हेटौँडा उपमहानगरपालिका वडा नम्बर १३ पदमपोखरीमा ४० जना कृषकहरुलाई कृषि सामग्री वितरण गरिएको छ । हेटौँडा उपमहानगरपालिकाको आर्थिक सहयोग तथा हेटौँडा १३ स्थित त्रिवेणी कृषि सहकारीको आयोजनामा कृषकहरुलाई कृषि सामग्री वितरण गरिएको हो ।
कृषकहरुलाई तरकारी पकेट कार्यक्रम अन्तर्गत कृषि सामग्री वितरण गरिएको हो । कार्यक्रममा उपस्थित कृषकहरुलाई हेटौँडा उपमहानगरपालिकाकी मेयर मीनाकुमारी लामा र हेटौँडा १३ का अध्यक्ष पेम्बा लामाले कृषि सामग्री वितरण गरेका थिए ।
कार्यक्रममा स्थानीय युवा कृषकहरु सुरज थिङ, फेन्चु लामा लगायत अन्य कृषक तथा स्थानीयहरुको उपस्थिति रहेको थियो । कृषकहरुलाई विषादी छर्ने मेसिन, बिउबिजन तथा अन्य सामग्रीहरु वितरण गरिएको थियो ।
