कमेडी च्याम्पियनको नयाँ एपिसोड अर्को सातामात्रै आउने
मकवानपुर । चर्चित कमेडी रियालिटी शो ‘कमेडी च्याम्पियन’ सिजन ३ को यो साता पनि नयाँ एपिसोडहरु नआउने भएको छ । साथै शोका सहायक निर्देशक तथा कमेडियन सुशान्त बस्यालको स्वास्थ्यका बारेमा पनि कार्यक्रम टिमले नयाँ जानकारी दिएको छ । कमेडी च्याम्पियन टिमले बिहीबार आधिकारिक फेसबुक पेजमार्फत शोको नयाँ एपिसोड र सुशान्तको स्वास्थ्यका बारेमा जानकारी दिएको हो ।
कमेडी च्याम्पियन टिमले दिएको जानकारी अनुसार अब उत्कृष्ट १० को प्रस्तुति अर्को सातामा मात्रै प्रसारण हुनेछ । टिमका अनुसार शोका सहायक निर्देशक सुशान्त बस्यालको स्वास्थ्य अवस्थामा पनि सुधार आएको छ ।
तालिका अनुसार गत साता र यो साता उत्कृष्ट १६ बाट छानिएका १० जना प्रतियोगीहरुको प्रस्तुति आउनुपर्ने थियो । तर कमेडी च्याम्पियनका निर्देशक विशाल भण्डारी, एसिस्टेन्ट डायरेक्टर तथा कमेडियन सुशान्त बस्याल, पवन भट्टराई, प्रकृति गिरी लगायतको टिम चढेको कार दुर्घटना भएका कारण नयाँ एपिसोड तयार पार्न नसकिएको हो ।
शोलाई तयार पार्ने समयमा कमेडियन सुशान्त बस्याल जो शोका सहायक निर्देशक पनि थिए, उनी जीवन र मरणको दोसाँधमा अस्पतालको आईसियुमा थिए भने निर्देशक भण्डारी प्रहरी हिरासतमा थिए । सिजन ३ की प्रतियोगी प्रकृति गिरी पनि सामान्य घाईते थिईन् । जसका कारण नयाँ एपिसोड तयार पार्न सकिएको थिएन । अब भने आउँदो साताबाट नयाँ एपिसोड आउने पक्का भएको छ ।
