मकवानपुरमा अवैध लागूऔषध गाँजासहित दुई जना पक्राउ
मकवानपुर । मकवानपुरको हेटौंडा उपमहानगरपालिका वडा नम्बर १५ रातोमाटेबाट अवैध लागूऔषध गाँजा जस्तो देखिने वस्तु करिब २ किलो ५ सय ग्रामसहित राक्सिराङ गाउँपालिका–१ बस्ने २ जनालाई शुक्रबार बिहान प्रहरीले पक्राउ गरेको छ।
प्रहरी चौकी रातोमाटेबाट खटिएको प्रहरी टोलीले हेटौंडाबाट पथलैयातर्फ जाँदै गरेको बा. ३ ख ८३८२ नम्बरको बसलाई जाँच गर्ने क्रममा बसमा सवार उनीहरूलाई उक्त लागूऔषधसहित पक्राउ गरेको हो।
पक्राउ परेका दुई जनालाई आवश्यक कारबाहीका लागि जिल्ला प्रहरी कार्यालय मकवानपुरमा राखिएको छ।
