सार्वजनिक पदमा निर्वाचितलाई हेटौँडामा सम्मान
मकवानपुर । मकवानपुर उद्योग वाणिज्य संघले आफ्नो सल्लाहकार, पूर्व अध्यक्ष, पदाधिकारी तथा सदस्य हालसालै विभिन्न सार्वजनिक पदमा निर्वाचित र नियुक्त भएकाहरुलाई सम्मान गरेको छ ।
संघका अध्यक्ष कृष्ण कुमार गुप्ताको अध्यक्षतामा एक कार्यक्रम आयोजना गरी सम्मान गरिएको हो । जसमध्ये संघका सल्लाहकार श्रीधर पोखरेल नेकपा एमाले मकवानपुरको जिल्ला अध्यक्ष निर्वाचित भएका हुन् । त्यस्तै संघका निवर्तमान अध्यक्ष तथा केन्द्रीय सदस्य कृष्ण कटुवाल बागमती प्रदेश विश्वविद्यालयका संरक्षक समिति सदस्य पदमा मनोनित भएका थिए ।
संघका पूर्वअध्यक्ष अरुणराज सुमार्गी बागमती प्रदेश विकास परिषद्को सदस्य मनोनित भएका थिए भने संघका उपाध्यक्ष उज्वल चौलागाई नेकपा एमाले मकवानपुरको जिल्ला सदस्य निर्वाचित भएका थिए ।
त्यस्तै संघका कार्यसमिति सदस्य नरेन्द्र भण्डारी हेटौंडा सिमेन्ट उद्योगको अध्यक्ष नियुक्त भएका छन् । उनीहरु सबैलाई सम्मानपत्र प्रदान गरी सम्मान गरिएको थियो । कार्यक्रममा संघका पदाधिकारी, सदस्य तथा कर्मचारीहरुको सहभागिता रहेको थियो ।
