हेटौँडामा विद्यूतको पोलमा आगोः अझै तार जोड्दै सेवा प्रदायक
मकवानपुर । हेटौँडा उपमहानगरपालिकाको कान्तिराजपथममा पोलमा आगलागी हुँदा तारहरु छिनेपछि अहिले पनि इन्टरनेट सेवा प्रदायकहरु तार जोड्न व्यस्त छन् । आगलागी भएपछि आगलागी भएका आसपासका फाईबर तारहरुमा पनि समस्या देखिएपछि अहिले पनि केही ठाउँमा ईन्टरनेट प्रभावित भइरहेको छ ।
बुधबार पोलमा आगलागी भएपछि इन्टरनेट र विद्यूत सेवा प्रभावित भएको थियो । हिजो बिहान करिब ७ः५० बजेको समयमा पोलमा एक्कासी आगलागी भएपछि विद्यूत र इन्टरनेट सेवा प्रभावित भएको थियो । कान्तिराजपथबाट पारिजात पथ जाने मोडको पोलमा आगलागी भएपछि केहीबेर अवरुद्ध भएको विद्यूत करिब ३ घण्टापछि सुचारु भएको थियो ।
अहिले पनि पारिजातपथ क्षेत्रमा आगलागीबाट प्रभावित भएका इन्टरनेट फाईबरहरुको मर्मत कार्य चलिरहेको छ । हेटौँडाका इन्टरनेट सेवा प्रदायक कम्पनीहरुका कर्मचारीहरु अहिले पनि पोलमा चढेर इन्टरनेट सेवा सुचारु गर्ने प्रयास गर्दैछन् ।
