स्वास्थ्यकर्मीमा संक्रमणले विराटनगरका अस्पतालको सेवा ठप्प
मकवानपुर । अस्पतालका चिकित्सक र स्वास्थ्यकर्मीहरूमा धमाधम कोरोना संक्रमण देखिन सुरु भएपछि विराटनगरका अस्पतालहरूले आकस्मिकबाहेक सबै सेवा बन्द गरेका छन् ।
सबैभन्दा पहिले अघिल्लो साता विराट अस्पताल(विराट नर्सिङ होम) का वरिष्ठ चिकित्सकसहित चार स्वास्थ्यकर्मीमा संक्रमण पुष्टि भएको थियो । चिकित्सक र स्वास्थ्यकर्मी नै संक्रमणको सिकार भएपछि विराट अस्पताल सिल गरिएको छ ।
पछिल्लो न्युरो अस्पतालको इमरेजेन्सीका अर्का एक चिकित्सकमा पनि कोरोना देखिएको छ । न्यरोले हिजो साँझबाटै अस्पतालको आकस्मिक वार्ड सिल गरिसकेको छ । अस्पताल सञ्चालकका अनुसार इमरेन्सी वार्डलाई सिल गरी पूर्णतः निर्मलीकरण नगरुन्जेल सञ्चालन गर्ने कुनै योजना छैन ।
अस्पतालले दुई महिनाअघि नै कोभिडको सम्भावित जोखिम मध्यनजर गर्दै कोभिड व्यवस्थापन समिनि गठन गरेको थियो । समिति अध्यक्ष रञ्जितराज बस्नेतले अस्पताल जनस्वास्थ्य र नागरिकको स्वास्थ्य सरोकारप्रति जिम्मेवार भएको बताएका छन् । सोहीअनुरूप इमरेन्जी वार्ड प्रोटोकलअनुसारै सिल गरिएको जानकारी दिए । न्युरोले वैकल्पिक आकस्मिक वार्ड सञ्चालनमा ल्याई सेवा सुरु गरिसकेको छ । न्युरो टाउको र मुटुसम्बन्धी उपचार गर्ने प्रदेश १ कै अग्रणी अस्पताल हो । यहाँ उपचारका लागि छिमेकी भारतबाट समेत धेरै बिरामी आउने गर्छन् ।
कोसी अस्पतालका नर्समा संक्रमण देखिएप्छि पोस्टनाटल वार्ड सिल भएको छ । पछिल्लोपटक फिभर क्लिनिकमा आएका एकजना संक्रमितको उपचारका क्रममा धरानस्थित बीपी प्रतिष्ठाना मृत्यु भएको थियो । मोरङको सुनवर्षी नगरपालिका वडा ८ का ४५ वर्षीय पुरुषको मृत्यु भएपछि कोसी अस्पतालले ओपीडी सेवा अनिश्चितकालका लागि बन्द गरिसकेको छ । अस्पतालका मेसु चुमनलाल दास भन्छन्, “जोखिम बढ्दै गएकाले हामीले ओपीडी बन्द गर्ने निर्णय लिएका हौं ।” उनले अर्को सूचना नआएसम्म ओपीडीको सेवा सुरु गर्न नसिकने जनाएका छन् ।
विराटनगर महानगरपालिकाको जनस्वास्थ्य महाशाखाले विराटनगरको म्याक्स अस्पतालसँग सम्बन्धित एकजना कर्मचारीमा कोरोना संक्रमण देखिएको जनाएको छ । तर, अस्पतालले भने ती संक्रमित कर्मचारी नभएर बिरामी भएको दाबी गरेको छ । अस्पतालले आकस्मिकबाहेक सेवा सञ्चालन नगरिएको जनाएको छ ।
नेपाल चिकित्सक संघ कोसीका अध्यक्ष डा. फरवार्ड सिलवाल अहिलेको परिस्थितिमा अस्पतालको आकस्मिकबाहेक सेवा सञ्चालन गर्न सक्ने अवस्था नरहेको बताउँछन् । सिलवालले भने, “हामीले आकस्मिकबाहेक सबै सेवा बन्द गर्न अस्पताल, स्थानीय र प्रदेश सरकारलाई समेत आह्वान गरिसकेका छौं ।” सिलवालका अनुसार धेरै अस्पतालले बहिरंगलगायत सेवा सञ्चालन गरेका छैनन् ।
चिकित्सक सिलवालले अहिले विराटनगरमा कोरोनाको संक्रमण फैलँदो अवस्थामा पुगेकाले सामान्य बिरामी भए अस्पताल नजान बरु अन्य माध्यमबाट परामर्श लिएर उपचार गर्न नागरिकलाई आह्वान गरिएको बताए । भने, “अस्पतालमा संक्रमणको दर बढ्दै जानुले हामीलाई पनि चिन्तित बनाएको हो ।” संघका तर्फबाट सिलवालले विज्ञप्ति जारी गरी आकस्मिकबाहेक सेवा सञ्चालन गर्न नसकिने जनाएका छन् ।बाह्रखरी डटकमबाट
