बाजुराको स्याउ धनगढी आइपुग्यो
मकवानपुर । बाजुरामा उत्पादित स्याउ धनगढी बजारमा आइपुगेको छ । मुख्यमन्त्री एकीकृत कृषि तथा पशुपन्छी विकास कार्यक्रमअन्तर्गत यस वर्ष पहिलो चरणमा हवाईजहाजमार्फत २० क्विन्टल स्याउ नेपालगन्ज हुँदै बुधबार धनगढी पुर्याइएको छ ।
हेर्दा राम्रो नदेखिए पनि बाजुराको स्याउ खाँदा भने स्वादिलो छ । सोही स्याउ अहिले सुदूरपश्चिम प्रदेशको धनगढी बजारमा पाउन थालेको हो । स्वदेशमै उत्पादन भएको स्याउलाई प्रवर्द्धन गर्ने उद्देश्यले बाजुराबाट २० क्विन्टल स्याउ धनगढी बजारमा बिक्री गर्न ल्याइएको ‘स्याउ कृषक समन्वय समिति’ले जनाएको छ । स्वामिकार्तिक खापर गाउँपालिकाको समन्वयमा बाजुराको स्याउ कोल्टीबाट धनगढीसम्म हवाई जहाजमार्फत ल्याइएको छ ।
स्याउ प्रतिकेजी ११० रुपैयाँमा धनगढी बजारमा खरिद गर्न पाइन्छ । समितिका अध्यक्ष मानबहादुर रोकायाले बाजुरामा ४० रुपैयाँमा खरिद गरेको स्याउ धनगढीसम्म आइपुग्दा प्रतिकेजी ११० रुपैयाँ पुगेको बताए । विभिन्न ठाउँमा भरिया, ट्याक्टर, जहाजबाट ढुवानी गर्नुपर्दा लागत बढेको उनको भनाइ छ ।
सुदूरपश्चिम प्रदेश सरकारका आन्तरिक मामिला तथा कानुनमन्त्री प्रकाश शाहले सुदूरपश्चिमलाई फलफूलमा आत्मनिर्भर बनाउन प्रदेश सरकारले विशेष कार्यक्रम ल्याएको बताए । बाजुरामा उत्पादित स्याउ भण्डारणका लागि प्रदेश सरकारले कोल्ड स्टोर निर्माण गर्ने योजना बनाएको पनि मन्त्री शाहले बताए ।
‘जसले एकपटक खायो, उसले स्वाद थाहा पायो’ भन्ने नाराका साथ बाजुराका विभिन्न गाउँमा फलेको स्याउ अहिले धनगढी बजारमा बिक्री भइरहेको हो । बाजुराको स्वामिकार्तिक खापर गाउँपालिकाका ५ वटै वडामा व्यावसायिक स्याउ खेती हुँदै आएको छ । गत वर्ष पनि बाजुराको स्याउ बिक्रीका लागि धनगढी, काठमाडौंलगायत ठाउँमा पुर्याइएको थियो । बाह्रखरी डटकमबाट
