सुशान्त मृत्यु प्रकरण :न्यायको माग्दै सुशान्तका साथीहरु भोक हड्तालमा बस्ने
मकवानपुर । अभिनेता सुशान्तसिंह राजपुतको मृत्यु भएको करिब चार महिना हुन लागिसकेको छ । उनी १४ जुनमा बान्द्रास्थित आफ्नै अपार्टमेन्टमा झुन्डिएको अवस्थामा फेला परेका थिए । उनको मृत्युको अनुसन्धान केन्द्रीय अनुसन्धान ब्युरो (सीबीआई) ले गरिरहेको छ ।
मृत्युको यति लामो समय बित्दा पनि उनको मृत्युको गुत्थी पत्ता लागेको छैन । जसले उनका परिवार र साथीभाइहरुमा झनै अशान्ति सिर्जना हुन थालेको छ । यही अशान्तिको परिणाम स्वरुप सुशान्तका दुई साथी भोक हड्तालमा बस्ने भएका छन् ।
सीबीआईबाट केही खबर नआएपछि न्यायको माग गर्दै उनका दुई साथी गणेश हिवरकर र अंकित आचार्य २ अक्टोबरदेखि भोक हड्तालमा बस्ने भएका हुन् ।
सुशान्तका साथी गणेश हिवरकरले इन्स्टाग्राममा एक भिडियोम सेयर गर्दै यसबारे जानकारी दिएका हुन् । गणेश र अंकित दुवै भएको उक्त भिडियोमा भनिएको छ, “हामी सुरुदेखि नै सुशान्तसिंह राजपुत हत्याको मुद्दामा न्यायको माग गर्दै आएका छौं । तर विगत केही दिनदेखि सीबीआईबाट कुनै अपडेट आएको छैन । नार्कोटिक कन्ट्रोल ब्युरो (एनसीबी) ले आफ्नो कामअनुरुप लागुऔषध मुद्दामा अनुसन्धान गरिरहेको छ । हामी ड्रग माफियाको पनि अन्त्य चाहन्छौं । ईडीले पनि आफ्नो काम गरिरहेको छ । तर हामी सुशान्तका लागि न्याय चाहन्छौं । यस सम्बन्धमा सीबीआईबाट कुनै अपडेट आएको छैन ।”
यदि प्रहरीबाट अनुमति मिल्यो भने दिल्लीको राजघाट अथवा मुम्बईमा भोक हड्तालमा जाने उनीहरुले बताएका छन् । “त्यसकारण हामी अक्टोबर २ बाट ३ दिनको भोक हड्तालमा जानेछौं । यदि प्रहरीको अनुमति मिल्यो भने हामी राजघाटबाहिर भोक हड्ताल गर्नेछौं । यदि दिल्ली प्रहरीबाट अनुमति मिलेन भने मुम्बई प्रहरीको अनुमति लिएर हामी मुम्बईमा गर्नेछौं । यदि मुम्बई प्रहरीबाट पनि अनुमति मिलेन भने हामी आफ्नै घरमा बस्नेछौ,” उनले भने ।
उनीहरुले उक्त भिडियो पीएम नरेन्द्र मोदी, अभिनेत्री कंगना रनौट, अभिनेता रवि किशन, मनोज तिवारीलगायतलाई पनि मेन्सन गरेका छन् ।बाह्रखरी डटकमबाट
