एमाले मकवानपुरको नयाँ नेतृत्वको लागि लम्साल र श्रेष्ठको दाबी, सर्वसम्मतको तयारी
मकवानपुर । नेकपा एमालको यहि पुस २३ र २४ गते देशभर जिल्ला अधिवेशन हुँदै छ । अधिकाशं जिल्लाहरुमा अधिवेशनको लागि स्थानीय तहहरुबाट प्रतिनिधि छनोट भइसकेका छन् ।
यसैबीच,मकवानपुर एमालेले पनि अधिवेशनको लागि जिल्लाको १० वटै स्थानीय तहबाट प्रतिनिधि छनोट गरिसकेको छ । हेटौंडामा हुने जिल्ला अधिवेशनको तयारी तिब्र भएको एमाले मकवानपुरले जनाएको छ । अधिवशेनको लागि जिल्ला कमिटीका सदस्यहरु र प्रतिनिधि समेत गरेर ८ सय जना रहेका छन् ।
अधिवेशनमा सर्वसम्मत नेतृत्व चयन गर्ने तयारी भईरहेको छ । नेतृत्वको लागि वर्तमान जिल्ला अध्यक्ष बद्री लम्साल र सचिव एकालाल श्रेष्ठले दाबी गर्ने बुझिएको छ ।
यसअघि लम्साल नेकपा विभाजन पछिको एमालेमा वरिष्ठ नेता माधव नेपालको पक्षमा खुलेका थिए भने श्रेष्ठ एमाले अध्यक्ष केपी शर्मा ओलीको पक्षमा खुल्दै एमाले मकवानपुरको नेतृत्व सम्मालेका थिए । श्रेष्ठले तत्कालिन नेकपा विभाजन पछि एमाले मकवानपुरलाई बलियो बनाउन १० वटै स्थानीय तहमा नेतृत्व चयन देखि पार्टी संगठनिक गतिविधिलाई तिब्रता दिएका थिए ।
तत्कालिन एमाले वरिष्ठ नेता नेपालले एमाले त्याग गर्दै नयाँ पार्टी नेकपा (एकिकृत समाजवादी)गठन गरेपछि एमाले २०७५ जेठ २ फर्किएपछि तत्कालिन एमाले मकवानपुरका जिल्ला उपाध्यक्ष लम्सालले एमाले मकवानपुरको नेतृत्व पाएका थिए ।
गएको भदौ २६ गते लम्सालको अध्यक्षतामा जिल्ला कमिटी बैठक बस्दै जिल्ला अधिवेशन आयोजक कमिटी गठन भएको थियो । यहि बिहिबार पुस २३ गते हुने अधिवेशनको उद्घाटन नेकपा एमालेका स्थायी कमिटी सदस्य काशीनाथ अधिकारीले गर्ने कार्यक्रम रहेको एमाले मकवानपुरले जनाएको छ ।
अधिवेशनले जिल्ला अध्यक्ष उपाध्यक्ष, सचिव, र दुई उपसचिव सहित एक सय ५ जनाको जिल्ला कमिटी चयन गर्ने बताईएको छ ।
