बागमती गाउँपालिकामा अटो दुर्घटना,एकको मृत्यु, दुईजना घाइते
मकवानपुर । मकवानपुरको बागमती गाउँपालिकाको लिलावन सडकखण्डको उकालो बाटोमा अटो ब्याक भई दुर्घटना हुँदा एक जनाको मृत्यु भएको छ । दुर्घटनामा परी दुई जना घाइते भएका छन् ।
मकवानपुर प्रहरीका अनुसार भोर्लेनीबाट यात्रु बोकेर झुरझुरे आउँदै गरेको ना १ ह ६३१७ नम्बरको अटो उकालो बाटोमा ब्याक हुन गई दुर्घटनामा परेको हो ।
अटो दुर्घटनामा घाइते हुनेमा बागमती गाउँपालिका वडा नम्बर ४ कि ४२ वर्षिया काउलिमाया रुम्बाको घटनास्थलमै मृत्यु भएको मकवानपुर प्रहरीले जनाएको छ । दुर्घटनामा घाइते हुनेमा बागमती गाउँपालिकाकै लालभित्ता निवासी १८ वर्षिया श्रीमाया घिसिङ र १२ वर्षिया मसलिमाया घिसिङ रहेका छन् ।
दुर्घटनामा परेको अटोका चालक फरार रहेका छन् । उनको खोजी भइरहेको मकवानपुर प्रहरीले जनाएको छ । असजिलो बाटोमा अटो चालकले तिब्र गतिले हाँक्ने गरेकाले अटोमा यात्रा जोखिम हुन थालेको छ ।
