कोरोना भाइरसले बढायो नेपालमा लसुनको मूल्य

लोकखबर
२१ माघ २०७६, मंगलवार ०८:०४

काठमाडौं। चीनमा फैलिएको कोरोना भाइरसका कारण नेपालमा चीनबाट आउँने लसुनको मूल्य बढेको छ ।
चीनमा कोरोना भाइरस फैलिएका कारण सरकारले नेपाल–चीन सिमाना बन्द गर्दा उत्तरी छिमेकबाट आयात हुने लसुनको आयातमा कमी आउनुका साथै यसको मूल्य पनि आकाशिएको छ ।

काठमाडौंमा लसुनको मूल्य प्रतिकिलो रू. २०० ले बढेको छ । काठमाडौंको बजारमा पुसको तेस्रो सातासम्म प्रतिकिलो रू.२५० रहेको सुकेको लसुनको औसत मूल्य अहिले बढेर रू. ५५० पुगेको पाइएको छ ।

पछिल्लो समय चीनबाट लसुनको आयात घटेको कालिमाटी फलफूल तथा तरकारी विकास समितिले बताएको छ । समितिका अनुसार पुस महीनामा चीनबाट २५० टन चिनियाँ लसुन आयात भएकोमा माघ महीनामा हालसम्म मात्र ९८ टन आयात भएको छ ।

गत सातादेखि आयात नै ठप्प भएकाले यसले बजारमा थप प्रभाव पार्न सक्ने समितिका सूचना अधिकारी विनय श्रेष्ठले बताए । श्रेष्ठका अनुसार यो समयमा अन्यत्रबाट लसुनको आयात कम हुने भएकाले बजारमा चिनियाँ लसुन बढी हुने गर्छ । आयात यसैगरी प्रभावित भए यो मूल्य अझै बढ्न सक्ने श्रेष्ठ बताउँछन् । भन्सार विभागको तथ्यांकअनुसार यस आवको पहिलो ६ महीनामा चीनबाट रू. ५४ करोड ५२ लाख बराबरको ५०७८ टन लसुन आयात भएको छ ।

प्रतिकृया

यसमा तपाइको मत

Your email address will not be published.


*