कोरोना भाइरसका विषयमा ट्रम्पले किमलाई पत्र लेखे
मकवानपुर ।विश्वमा तीब्र गतिमा फैलिरहेको कोरोना भाइरसका विषयमा अमेरिकी राष्ट्रपति डोनाल्ड ट्रम्पले उत्तर कोरियाली सर्वोच्च नेता किम जोङ उनलाई पत्र लेखेका छन् ।
सर्वोच्च नेताकी बहिनी किम यो जोङलाई उदृत गर्दै उत्तर कोरियाली समाचार संस्था केसीएनएले जनाएअनुसार पत्रमा ट्रम्पले जनतालाई कोरोना भाइरसबाट जोगाउन सर्वोच्च नेताको पहलबाट प्रभावित बनेको उल्लेख गरेका छन् ।
ट्रम्पले महामारीविरुद्धको कामका लागि उत्तर कोरियासँग सहकार्य गर्ने इच्छा व्यक्त गरेको पनि उक्त पत्रमा उल्लेख रहेको केसीएनएले जनाएको छ ।
आफ्नो मुलुकमा हालसम्म कोरोना भाइरसका एकजना पनि संक्रमित देखा नपरेको उत्तर कोरियाले बताउने गरेको छ ।
यस पत्र कहिले प्राप्त भएको भन्नेबारे केसीएनएले केही खुलाएको छैन ।
अमेरिकी अधिकारीले पनि उत्तर कोरियाली सर्वोच्च नेतालाई ट्रम्पले पत्र लेखेको पुष्टि गरेका छन् । कोरोना भाइरस महामारीविरुद्ध लड्ने विषयमा विश्वका नेताहरुसँग सम्पर्क गर्ने पहलस्वरुप उक्त पत्र उत्तर कोरिया पठाइएको ह्वाइट हाउसका अधिकारीलाई उद्धृत गर्दै समाचार संस्था रोयटर्सले जनाएका छन् ।
गत वर्षको फेब्रुअरी महिनामा ट्रम्प र किमबीच भएको शिखर वार्ता असफल भएयता दुई मुलुकबीचको सम्बन्धमा सुधार आउन सकेको छैन ।
यद्यपि दुई नेताबीचको व्यक्तिगत सम्बन्ध भने राम्रो रहेको अमेरिकी राष्ट्रपति ट्रम्पले बताउँदै आएका छन् ।
पछिल्ला केही समययता उत्तर कोरियाले नियमितजसो क्षेप्यास्त्र परीक्षण गर्दै आएको छ । शनिबार मात्रै उत्तर कोरियाले दुई वटा छोटो दुरीका क्षेप्यास्त्र परीक्षण गरेको थियो । खबरहब डटकमबाट
