काठमाडौं गइरहेको सुमो भीमफेदीमा दुर्घटना हुँदा दुई जनाको मृत्यु, पाँचजना घाइते
मकवानपुर । दक्षिणकाली दर्शन टाटासुमो सेवाको सुमो मकवानपुरको भीमफेदी ६, गढीमा आज दुर्घटनामा परेको छ ।
हेटौंडाबाट यात्रु लिएर काठमाडौं जाँदै गरेको ना.१ ज. ४१०६ नम्बरको सुमो मध्यान्ह १२ बजेतिर दुर्घटनामा हुँदा दुई जनाको घटनास्थलमै मृत्यु भएको छ भने पाँच जना घाइते भएका छन् ।
सुमोमा एक बालक सहित ७ जना रहेका थिए । सुमोमा ३ जना पुरुष र ४ जना महिला रहेको घटनास्थलमा रहेका लोकखबर सहकर्मी रामकुमार दानीले जनाएका छन् । सडकबाट अन्दाजी २ सय मिटर तल सुमो खसेको हो ।
दुर्घटनामा परेका मध्ये सवारीचालक, एक महिला र एक बालक गरी तीन जनालाई उद्दार गरी उपचारका लागि हेटौंडा ल्याईएको छ ।
अप्ठ्यारो भीरमा सुमो खसेकाले दुर्घटनामा परेका अन्यको उद्दार कार्य भइरहेको छ । उद्दार कार्यमा भीमफेदी ब्यारेकका सेना र इलाका प्रहरी भीमफेदीका प्रहरी खटिरहेको जनाइएको छ ।
