मकवानपुरमा सिग्देल नेतृत्वको एमाले एकीकृत समाजवादीमा रुपान्तरित, श्रीधर पोख्रेल अध्यक्ष
मकवानपुर । एमाले मकवानपुरको मुनु सिग्देल नेतृत्वको पार्टी आज विहाबार एकीकृत समाजवादीमा रुपान्तरित भएको छ ।
हेटौंडाको एक प्यार्टी प्यालेशमा आयोजित भेलामा पार्टी केन्द्रीय सदस्य समेत रहेकी सिग्देलले आफू नेतृत्वको एमाले जिल्ला कमिटीलाई एकीकृत समाजवादी पार्टीमा रुपान्तरण भएको घोषणा गरिन् ।
भेलाले तत्कालीन नेकपा एमाले सचिवालय सदस्य रहेका श्रीधर पोखरेल जिल्ला अध्यक्ष भएका छन् भने तत्कालीन एमाले जिल्ला कमिटी सचिव मीना लामा उपाध्यक्ष,सचिवमा बिष्णुप्रसाद दाहाल चयन भएका छन् । यस्तै, कार्यालय सचिवमा तिलक अधिकारीलाई निरन्तरता दिइएको नेकपा एकीकृत (समाजवादी) की केन्द्रीय सदस्य सिग्देलले भेलामा घोषणा गरिन् । केन्द्रिय सदस्य सिग्देलका अनुसार जिल्ला कमिटी सदस्यको संख्या २५५ रहेको छ ।
भेलामा समाजवादीका केन्द्रीय सदस्य केदार न्यौपालेले केपी ओली कम्युनिष्ट हुन नसकेकाले विद्रोह गरेको बताए । उनले माक्सर्वाद, लेलिनवाद मान्ने पार्टीलाई केपीवादमा पुर्याइएकाले असल कम्युनिष्ट पार्टी निर्माणका बिद्रोह आवश्यक परेको बताए ।
