हेटौंडामा ऋिद्धीसिद्धी सिमेन्ट उद्योग सञ्चालनमा
मकवानपुर । मकवानपुरको हेटौंडामा अर्को एउटा उद्योग सञ्चालनमा आएको छ । हेटौंडा सिमेन्ट उद्योग, शिवम् सिमेन्ट उद्योग सञ्चालन भइरहेको हेटौंडामा ऋिद्धीसिद्धी उद्योगले पनि उत्पादन सुरु गरेको हो । करिब नौ अर्ब लागतमा आधुनिक प्रविधि युक्त सिमेन्ट उद्योग सञ्चालन गरिएको हो ।
हेटौँडा उपमहानगरपालिका १५ रातोमाटेमा करिब ४२ बिगाहा क्षेत्रफलमा स्थापित उद्योग सञ्चालनमा ल्याइएको जनाइएको छ । उद्योग सञ्चालनका लागि तीन जनाले संयुक्त रुपमा लगानी गरेको उद्योगका महाप्रबन्धक गणेशकुमार सिंहले जानकारी दिए । उद्योगले दैनिक तीन हजार टन सिमेन्ट उत्पादन गर्ने लक्ष्य लिएको उनले बताए । उद्योगले सिमेन्टको लागि चाहिने क्लिङ्कर लगायत आवश्यक कच्चा पदार्थ उत्पादन गर्नुका साथै क्लिङ्कर लगायतका कच्चा पदार्थ खरीद गरी ओपिसी सिमेन्ट उत्पादन तथा बिक्री वितरण गरिएको उद्योगले जनाएको छ ।
उद्योगले हाल मकवानपुरको भीमफेदी गाउँपालिका स्थित खानीबाट चुनढुङ्गा उत्खनन् गरी सिमेन्ट उत्पादन गरिरहेको छ । हेटौंडामा ठूलो लगानीमा ऋिद्धीसिद्धी थपिएसंगै सिमेन्ट उद्योगका बिच प्रतिष्पर्धा पनि बढ्दो छ ।
