मकवानपुरमा कृषि बिमा गर्ने जिम्मा शिखर इन्स्यारेन्सलाई
मकवानपुर । कृषि बीमालाई देशव्यापी बनाउने र कृषकलाई राहत दिने लक्ष्यका साथ सरकारले अगाडी सारेको कृषि बीमा योजना मकवानपुरमा पनि सन्चालन हुने भएको छ । योजना प्रभावकारी रुपमा सन्चालनका लागि बीमा समितिले २० वटा निर्जीवन बीमा कम्पनीलाई कार्यक्षेत्र तोकेको छ ।
मकवानपुरमा शिखर इन्स्योरेन्सले कृषि विमा कार्यको जिम्मा पाएको छ । शिखरले चितवन, धादिङ र नुवाकोटमा पनि कार्य गर्नेछ ।
घुम्ती सेवामार्फत कृषि तथा पशुपक्षी बीमा गर्नका लागि बीमा कम्पनिलाई बीमा समितिले निर्देशन दिएको छ । कृषकलाई बीमासम्बन्धी जनचेतना जगाउने र बीमाका लागि अभिप्रेरितसमेत गर्नुपर्ने गरी कार्यक्षेत्र तोकिएको समितिले जनाएको छ ।
सरकारले चालू आर्थिक वर्षको नीति तथा कार्यक्रम एवं बजेटमा समेत कृषि बीमालाई प्रमुख प्राथमिकतामा राखी देशव्यापीरुपमा लागू गर्ने लक्ष्य राखेको हो ।
देशका ७७ वटै जिल्लामा विभिन्न निर्जिवन बीमा कम्पनिका लागि कार्यक्षेत्र तोकिएको छ । कृषिमा बीमा गराई किसानलाई कृषि कर्ममा लागिपर्न अभिप्रेरित गराउँनका लागि सरकारले योजना अघि बढाएको जनाइएको छ।
