छोटो दुरीको सडक अवरुद्द हुँदा दैनिक पाँच हजार जना यात्रु प्रभावित
मकवानपुर । अविरल वर्षाका कारण हेटौंडाबाट फाखेल हुँदै काठमाडौं जाने सडक अवरुद्द बनेको छ । सोमबारको वर्षाले महालक्ष्मी खोलामा पहिरो गएर सडक अरुद्द बनेको जिल्ला प्रहरी कार्यालय मकवानपुरले जनाएको छ ।
वर्षाकै कारण हेटौंडा-भीमफेदी-कुलेखानी-सिस्नेरी हुँदै दक्षिणकाली निस्कने बाटो पनि बन्द छ । छोटो दूरीको सडक अवरुद्द बनेपछि हेटौंडा-काठमाडौं आवाज जावत गर्ने करिब ५ हजार यात्रु दैनिक प्रभावित बनिरहेका छन् ।
हेटौंडादेखि काठमाडौंसम्म छोटो दुरीमार्फत दैनिक ६ सय वटा भन्दा बढी सवारी आवाज जावत गर्ने गरेका छन् । अहिले काठमाडौं जानका लागि त्रिभुवन राजपथ भने खुल्ला रहेको प्रहरीले जनाएको छ ।
बर्षाका कारण सडक अवरुद्द बनेपछि मकवानपुरको विभिन्न ग्रामीण भेगबाट हेटौंडा आउँनुपर्ने यात्रु प्रभावित बनेका छन् ।
मकवानपुरको थाहा नगरपालिका, मकवानपुरगढी, बकैया,कैलाश,इन्द्रसरोबर र बागमती गाउँपालिकामा सडक क्षतिग्रस्त बनेपछि सवारी साधन सञ्चालनमा आउँन सकिरहेका छैनन् ।
